ཆ་འཕྲིན་ལས་གཞིས་ལུས་བུད་ཅིག་ལ་ཐུག་རྗེས།

རྩེད་མཚར་དང་ཀུ་རེའི་ཁྲོད་ཆ་འཕྲིན་གྱི་གཏམ་སྒོ་འབྱེད་དུས། དུང་བ་ཟབ་མོ་ཞིག་གིས་ཞོ་ལྟར་ཆགས་པའི་ཕ་ཡུལ་གྱི་རི་ཆུ་ནགས་གསུམ་ལ་བདེ་འཚམས་གླེང་ཞོར་། ལྷད་མེད་ཀྱི་གཤིས་ཀ་དངས་མོ་ཞིག་གི་འགྲིན་ངག་གཡར་ནས་ཡལ་བཞིན་པའི་མཐོ་སྒང་གིི་རྣམ་ཤེས་ཤིག་ལ་བླ་འགུགས་བྱས་པ། ས་མཐའི་གནས་མལ་ནས་རྙེད་པའི་ཆེས་ཐོག་མའི་གཤིས་ཀ་གཉོམ་ཤེས་ཤིག་དང་། ཆེས་མཐའ་མའི་གྱེས་ཕྱག་ཟབ་ཤེས་དེ་ཡང་ཡིན། སྲིང་ཆུང་མ་། ལས་སྐལ་ཀྱི་བདག་མོ། མཐོ་སྒང་གི་མ་ཡུམ། ཆ་འཕྲིན་ལས་རང་སྐད་གཙང་མའི་ལབ་གླེང་བྱས་པ། ས་མཐའི་ཁྱིམ་གཞི་ལ་དྲོད་ཁོལ་ཡལ་བའི་མུན་ནག་གི་མཚན་མོ་ཡིན་ལ།སྙན་འགྱུར་གྱི་དབྱངས་དབྱངས་རྟ་ལས་བརྩེ་སེམས་ཀྱི་གླུ་གཞས་བླངས་
པ། ས་མཐའི་ཁེར་རྐྱང་གི་འཚོ་བ་ལ་ཆག་གྲུམ་ཤོར་བའི་མི་ལོ་ཉི་ཤུའི་དྲན་ཐོ་ཡིན། དུས་ཚོད་ཀྱི་བརྡབ་གསིག་ལས་མི་འདོད་པའི་གྱེས་ཕྱག་ཕུལ་བ།རྒྱལ་ཁབ་མེད་པའི་འབངས་མི་ཞིག་གི་ལས་དབང་
གི་ཁ་ཕྱོགས་ཡིན། སྲིང་ཆུང་མ། སྐབས་འདི་གི་མགོ་མཇུག་ན། ང་དང་གྲོགས་པོ་ཚོའི་རང་རང་གི་དུངས་ཀ་དང་མྱོང་ཚོར་ལ་སྡོམ་ཚིག་རེ་རྒྱག་ཞོར ཁྱེད་དང་ཁྱེད་ལྟ་བའི་བོད་རིགས་རྣལ་མ་དག་
གི་བོད་ལ་གཙང་མ་རེ་དང་བོད་སྐད་དག་མོ་ཞིག་ནམ་ཡང་མཇལ་འདོད་དང་དུངས་ཀ་ཆེ། སྲིང་ཆུང་མ། ལས་སྐལ་གྱི་མུན་པ་འཐུག་ས་ན་། ང་དང་ཁྱེད་ ད་དུང་གཞན་དག་གང་མང་ཞིག འདི་ལྟར་གྱེས་བྲལ་གྱི་མནར་གཅོད་འོག མི་ལོ་ལྔ་བཅུའི་ལོ་ཟླའི་རྒྱུད་རིམ་ལ་མི་འདོད་པའི་གྱེས་ཕྱག་ཕུལ་བ། བདེན་དོན་དངོས་མ་ཞིག་གི་ཆེད་ཡིན་པས། སེམས་མ་སྐྱོ། བློ་མ་ཕམ།
གྲ་སྒྲིག་སྡུག་ས་ནས་བྱེད་ཞོར། རེ་བ
བཟང་སར་རྒྱག་དགོས། ལས་སྐལ་གྱི་བདག་མོ། འདི་ནི་ཆེས་རླབས་ཆེན་གྱི་སྐྱབས་གནས་ཤིག་གི་ཞལ་ཆེམས་ཡིན་པས། ངེས་པར་དུ་ཡིད་ཆེས་དང་ལག་ལེན་བྱེད་ཞོར། མདུན་ནས་མདུན་དུ་སྐྱོད་དང་།
བསླུ་བ་མེད་པའི་སྐྱབས་གནས། ནམ་ཡང་མཆོག་གསུམ་ཡིན།

བདེ་མོ་བྱོས་།

ད་བདེ་མོ་བྱོས
ང་དངོས་ནས་ཨ་ཐང་ཆད་སོང་
བདེ་མོ་བྱོས

འཇིག་རྟེན་ཁ་དཔེ་ལ
བརྗེད་རྒྱུ་མེད་རུང་རྙིང་རྒྱུ་ཡོད་ཟེར་བ
དངོས་གནས་བདེན་པ་རེད དེའི་རྐྱེན རི་ངོགས་ཀྱི་གྲོང་ཚོ་འདི་ནས
བདེ་མོ་བྱོས

ངག་རྒྱུན་གྱི་མགྲོན་པས་ཀྱང་
ལས་འབྲས་ལྡོག་མེད་ཡིན་གསུངས་པ
འཇིག་རྟེན་དཀར་ངོགས་འདི་ནས ཞིབ་འདང་རེ་བརྒྱབ་ན
དེ་ཡང་བདེན་པར་ངེས་པས
ལྐོག་གྱུར་གྱི་གསང་ལམ་འདི
བདེ་མོ་བྱོས

བརྗེད་མི་ཐུབ་པ་ཞིག་ལ
རྡོ་རྗེ་ཡིན་ཟེར་བ
ཁྱེད་ཀྱི་ལྐོག་གྱུར་གྱིས་མཐའ་ཚིག་ཡིན་ལ
བདག་གི་ན་ཟུག་ཅིག་གིས་ཁ་སྣོན་དང་
ཆེས་མཐའ་མའི་གྱེས་ཕྱག་ཕུལ་ས་དེ་ཡང་ཡིན་པས
དྲན་ཤིང་གི་ཁུགས་འགོ་འདིར
འགྱུར་བ་ཞིག་དང་ལྷན་དུ་བཞུད་འགྲོ་ངེས
བདེ་མོ་བྱོས

སོ་སོའི་དམིགས་འབེན་དངོས་མ་ཞིག་དང་
དུང་བ་ངོ་མ་ཞིག་གི་ཆེད་དུ་
གཏན་དུ་བདེ་མོ་བྱོས
བདེ་མོ་བྱོས

སྒེའུ་ཁུང་བརྒྱབ་འདུག

ལོ་ཟླའི་དྲན་ཤིང་གི་མངར་ཁ་རུམ་ཁ་པའི་ཞག་ལྒོྲན་འོག་ན
ལས་རླུང་གི་དེད་པའི་གསལ་ལ་མི་གསལ་པའི་ཞལ་རེས་ཤིག་གི་སྒྲོམ་གཞིའི་འོག་ནས
གནས་ཚང་མ་གཡར་བའི་ངོ་གདུང་ལ་ས་རྡུལ་ཆགས

ཕལ་ཆེར་ལོ་གཅིག་དང་ཟླ་ངོ་ཁ་ཤས་འགོར་བའི་དེ་རིང་
རྒྱུན་ལྡན་གྱི་གོམ་གཤིས་བཞིན་ཆགས་པའི་ལམ་འགྲམ་ནས་ཕར་བལྟས་ན་སྒེའུ་ཁུང་ད་དུང་བརྒྱབ་འདུག
ཤེལ་ངོས་དང་ཉེ་འཁོར་གྱི་འཁོར་ཡུག་ཀུན་ལ་ས་རྡུལ་ཆགས་ནས་ཡུན་རིང་འགོར་བའི་སྣང་བ་ལྟར
མ་གཞི་ཁོ་སོང་ནས་ཉིན་ཁ་ཤས་ལས་འགོར་མེད
བུད་སོང་བའི་སྣང་བ་ཞིག་དང་བོར་སོང་བའི་ཚོར་སྣང་ཞིག་གིས་བརྒྱབ་འདུག་པའི་སྒེའུ་ཁུང་ལ་ཡང་ཡང་སོ་བལྟ་བྱས
འདི་ནི་འགྲོ་འདུག་ལ་དབང་མ་ཐོབ་པའི་སེམས་པ་ཞིག་གི
ཁ་བྲལ་བའི་ཉིན་འགའི་ཚོར་སྣང་དང་རེ་སྒུག་གི་བསྐྱལ་བའི་ཆེས་བའི་བརྩེ་སེམས་ཀྱི་དངས་མ་ཡིན

ལས་དབང་།

འཚོ་བའི་ངོས་འདི་རི་གཟར་བྲག་རོང་འདྲ།།
མི་འདོད་ལས་འདི་དབྱར་ཁའི་གནམ་ངོ་འདྲ།།
རྣམ་རྟོག་རྒོད་པོ་ཐུར་མེད་རྟ་མཆོག་འདྲ།།
ཉམ་ཆུང་ལས་འདི་རི་སྤྱང་སྔོན་མོ་འདྲ།།

བདག་གི་སྙན་ངག་གི་ལྷ་མོ་རྡོ་རྗེ་ལ།

སེམས་པ་སེམས་ཀྱིས་མ་ཤེས།།
བརྩེ་བ་བརྩེ་བས་མ་བསྐྱངས།།
ཁྱེད་ལ་འཁྲེང་བའི་སེམས་པ།།
མྱི་ཁའི་ཀློངས་ནས་རྒས་སོང་།།

སེམས་དང་བསམ་པ་མ་མཐུན།།
ལུས་དང་གྲུབ་མ་མ་འདྲེས།།
ཨ་ཐང་ཆད་པའི་སེམས་པ།།
ཆར་ཡན་ཀློང་ནས་བོར་སོང་།།

རེ་བ་ལྷ་ལ་བཅོལ་ཏེ།།
རེ་ལྟོས་མི་ལ་བྱས་ཀྱང་།།
རེ་འབྲས་ན་བུན་མཐུག་པོ།།
རེ་བཞག་ཁྲོད་ནས་ཡལ་སོང་།།

ཡིག་ལན་མེད་པའི་འཕྲིན་པ།།
སེམས་དང་བསམ་པའི་ཕོ་ཉ།།
གོ་མེད་ཚོར་མེད་ངང་ནས།།
རྨི་ལམ་ཞིང་ལ་ཆས་སོང་།།

བདག་མ་ཐུབ་པའི་གོམ་ཁ་
བར་དོའི་པའི་རྣམ་ཤེས་ཡིན་ལ
ལོ་མ་སེར་པོའི་ལས་དབང་ཀྱང་ཡིན

བྲན་་གཡོག།

སྨྲ་བརྗོད་དང་རང་དབང་གི་དབང་བསྒྱུར་བོར་བའི་
དཀྱོགས་མཚམས་དང་པོ
སྐྱག་དྲི་དང་གཅིན་དྲི་འཐིལ་བའི་མལ་ས་རྫོབ་རོ
ཡོད་ཚད་ལ་རོ་ལངས་བརྒྱབ་རྗེས་དུར་སྒམ་
ནག་པོ་ཞིག་ལས་མ་འདས
མིང་བྱང་རུལ་བ་ཞིག་གི་ཆོ་ལོ་ཁྱེད་ལ་རེག་དུས
ལས་སྐལ་གྱི་ལྷ་ཚོགས་ལ་དབང་པའི་བྲན་གཡོག་དངོས་མ་དེ་ཁྱེད་ཡིན
གདོད་མ་ནས་སྲོལ་རྒྱུན་རྙིང་པ་ཞིག་གི་

མིང་བྱང་ཁྱེད་ལ་གནང་བ
བླ་ཆེན་དང་སྐུ་དྲག་ཚོས་བྱིན་རླབས་ཡིན་ལ

འཇགས་མི་སྲིད་པའི་བཞུར་རྒྱུན་འདིའི་ལན་ཆགས་ཀྱང་ཡིན

ལས་དབང་གི་དེད་པའི་ལོ་མ་སེར་པོའི་གྲུ་ཁ།

འདི་ནི་དུང་ཁ་དང་
རང་དབང་གི་ཁ་ཕྱོགས་གླེང་བའི་
མི་རྐྱྔང་ཞིག་གི་
བཟི་ཁའི་གྲུ་ཁ་ཡིན་ལ་

འདི་ནི་ཟོས་ཐབ་མེད་པའི་རྨ་ཁ

གང་མང་ཞིག་གི་

རྨ་ཤུལ་ཀྱང་ཡིན

ད་དུང་འདི་ནི

འཛུམས་མདང་འོག་གི་

ཡིད་ཆེས་བོར་བའི་

མིང་བྱང་ནག་པའི་ཤུལ་བཞག་ཀྱང་ཡིན