རང་ཉིད་ལ་བཤད་པའི་སྐད་ཆ།

ཁྱེད་རང་གིས་མི་སུ་ལ་ཡང་འཕོག་ཐུག་གཏོང་འདོད་མེད་ཟེར་ནས་ནམ་ཡང་སེམས་ནང་དུ་དྲན་བཞིན་ཡོད་ན་ཡང་། མི་ཟེར་བ་འདིས་བསམ་བློ་བཏང་བ་དང་ལག་ལེན་དུ་བསྟར་དུས་ཀྱི་སྐབས་སུ། མཚམས་རེར་བསམ་ཐོག་དུ་འགྲོ་བ་ལས་མང་ཤོས་ནི་བསམ་ཐོག་དུ་འགྲོ་དཀའ་བ་ཡིན་སྟབས། ཁྱེད་རང་གིས་གནས་ལུགས་དང་རྒྱུ་མཚན་ཡོད་མེད་གཅིག་བུ་ལ་བསམ་བློ་བཏང་ནས་བསྡད་པ་ཡིན་ན། ཁྱེད་རང་ལ་མི་མང་བོ་ཞིག་གིས་མིང་ཚིགས་སྙན་པོ་ཞིག་གནང་ངེས་ཡིན། དེའི་མིང་ལ་མི་དྲང་མོ་དང་ཡང་ན་ཡ་རབས་ཟེར་ངེས་ཡིན་ཟེར་ནས་ཁྱེད་རང་གི་ཐེངས་མང་བོ་གོ་མྱོང་བ་དེའི་ཐད་དུ་བསམ་བློ་ཡང་མི་ཉུང་བ་ཞིག་གཏོང་མྱོང་ཡོད་པ་རེད་ལ། རང་གིས་སེམས་ནང་དུ་མི་ལ་འཕོག་ཐུག་གཏོང་འདོད་མེད་པ་དེ་ནི་ཁྱེད་རང་གི་བསམ་བློ་དངོས་ཡིན་ཡང་། ཁྱེད་རང་དངོས་སུ་སྤྱི་ཚོགས་ནང་དུ་ཞུགས་དེ་སོང་དུས་མི་ཚང་ཁྱེད་རང་ལྟར་བསམ་བློ་དེ་འདྲ་གཏོང་མཁན་མིན་སྟབས། ཁོང་ཚོས་གང་བྱེད་པ་དང་ག་རེ་བྱེད་ན་ཡང་མི་ལ་དོགས་པ་རྣམ་དོག་བྱེད་རྒྱུ་དགའ་ལ་དེ་དང་འགྲོག་ནས་རང་ཉིད་ཀྱི་བསམ་ཐོག་དུ་མ་སོང་བའི་སྐབས་སུ་མི་ལ་བརྟུན་ཟེར་བ་དེ་འདྲ་ཁོང་ཚོས་བྱེད་མི་ཤེས་ལ། དེ་ལྟར་བྱས་པ་ཡིན་ན་ཁོང་ཚོས་རང་གི་ལ་རྒྱ་ཤོར་སོང་བར་འདོད་ཀྱི་ཡོད་པ་རེད།

ཁྱེད་རང་གིས་དེའི་སྟབས་ཀྱི་རང་གི་གང་བསམ་པ་ཡོད་ཚད་སེམས་གཏིང་གི་ཤ་ཚའི་སྒོ་ནས་བཤད་ཀྱི་ཡོད་མེད་གང་ལྟར་ཡང་། ཕར་ཕྱོགས་ཀྱི་མི་དེ་དག་ནི་ནམ་ཡང་དོག་པའི་དབང་གི་མི་ཚེ་བསྐྱེལ་རྒྱུར་གྲ་སྒྲིག་བྱས་དེ་བསྡོད་ཡོད་མཁན་རྐྱང་རྐྱང་ཡིན་སྟབས། ཁྱེད་རང་གི་སྐད་ཆ་གང་ཞིག་བཤད་ན་ཡང་གཟབ་གཟབ་བྱོས་དེ་མ་བཤད་ན་སྐད་ཆ་ཚིག་གཅིག་བཤད་ནོར་ཐེབས་པ་ཡིན་ན་ཕར་ཕྱོགས་ཀྱི་མི་དེའི་རིགས་ཀྱི་བཟོད་བསྲན་ཟེར་བ་བརྟེན་མྱོང་མེད་ལ། དེ་ལྟར་བྱས་པ་ཡིན་ན་ནི་རང་ཉིད་སྡར་མ་རུ་བརྩི་བཞིན་ཡོད། ལུགས་སྲོལ་དེ་དང་འགྲོག་ནས་འཚར་ལཽངས་བྱུང་བའི་ཁོང་ཚོའི་སེམས་ནང་གི་ང་རྒྱལ་དེ་ནི་ཁོང་ཚོ་ལ་མཚོན་ན་རང་ཉིད་ཀྱི་སྐྱབས་མགོན་དུ་བསམ་བཞིན་ཡོད། འགྲོ་བ་མི་ཟེར་བ་འདི་ལ་ཁོང་ཁྲོ་ནི་མེད་མཁན་ཞིག་དཀོན་ན་ཡང་། ཁོང་ཁྲོ་སྐྱེ་སླ་བ་དང་ཁོང་ཁྲོ་ལག་ལེན་བྱེད་མིན་གཉིས་ཡོད་པ་རེད། དེའི་སྟབས་ཀྱི་ཁྱེད་རང་གི་ཏན་ཏན་ཏིག་ཏིག་མ་གནང་ན་ཁོང་ཁྲོ་ལག་ལེན་ལ་གོམ་པའི་མི་དེ་དག་གིས་ཁ་སང་གྲོགས་པོ་དང་སྙིང་ཉེ་ཡིན་ཡང་། དེ་རིང་ཁྱེད་རང་ནང་གཉར་གྱི་ཁྱི་ལས་ཀྱང་བརྩིས་མཐོང་མེད་པ་དེ་འདྲ་བྱེད་མི་སྲིད་པ་གཏན་ནས་མིན།

ཁྱེད་རང་གིས་ཁྱེད་རང་གི་གང་བསམ་པ་ཡོད་ཚད་ཀྱང་བདེན་པ་དང་གནས་ལུགས། ཡང་ན་རྒྱུ་འབྲས་དང་རྒྱུ་མཚན་ཚད་མ་ཡིན་བསམ་བཞིན་མེད་པ་རེད་ལ་དེ་ལྟར་བསམ་ན་ཡང་རང་ཉིད་ཀྱི་ནོར་འཁྲུལ་ལས་མི་གཞན་གང་གིས་ཀྱང་ནོར་འཁྲུལ་མིན་པ་དུས་རྟག་དུ་སེམས་ནང་ནས་བརྗེད་མི་རུང་། འོན་ཀྱང་། མི་འདྲ་མིན་དང་གཞིབ་དུས་སྐད་ཆ་འདྲ་མིན་ཞིག་བཤད་དགོས་དུས་དེའི་ཐད་དུ་བསམ་བློ་ཞིབ་མོ་ཞིག་བཏང་། མི་དེ་ལ་བསམ་ཚུལ་དང་གྲོས་མོལ་བྱེད་ས་ཞིག་ཉན་ས་རེད་དང་མ་རེད། ཡིན་ན་ནི་བསམ་ཚུལ་བརྗེ་རེ་དང་གྲོས་མོལ་བྱས་ན་མ་འགྲིག་པ་མེད་ལ་དུས་ཚོད་བཟང་བོ་ཞིག་དང་ཕན་ཚུན་ལ་རོག་འདེགས་བྱས་པ་རང་ཡིན། དེ་མིན་མི་དེ་ནི་ང་རྒྱལ་དང་རང་རློམ་ཁོ་ན་ལས་མི་གཞན་གྱི་གང་བཤད་ལ་བསམ་ཤེས་དང་བརྩི་བཀུར་མེད་མཁན་ཞིག་ཡིན་ན། ཁྱེད་རང་གིས་མི་དེའི་རིགས་ལ་ཨུ་ཚུགས་མཐའ་བསྐྱེལ་བྱེད་དགོས་དོན་གང་ཡང་མེད། མི་དེའི་རིགས་ལ་དེའི་རིགས་ཀྱིས་བཅོས་མཁན་ཞིག་ཡོང་ངེས་ཡིན་ལ། རང་ཉེས་ངོས་ཟིན་པའི་དུས་ཚོད་རེ་ཡང་ཤར་ངེས་ཡིན།

ཁྱེད་རང་གི་རྟག་དུ་སེམས་ཁོང་དུ་སྡུག་བསྔལ་མང་བོ་ཞིག་བསུ་བཞིན་ཡོད་ལ། དེ་དག་ལ་བསམ་བློ་མང་བོ་ཞིག་བཏང་མཐར། སྡུག་བསྔལ་དེ་དག་ག་ལེར་འདོར་རྒྱུ་ལ་ཡང་རྩོམ་པ་བྱེད་ཀྱི་ཡོད་ལ། ཁྱེད་རང་གི་སྐབས་རེ་ལས་སླ་བོའི་སྒོ་ནས་འདོར་ཐུབ་ཀྱི་ཡོད། ཁྱེད་རང་གི་ལས་སླ་བོའི་སྒོ་ནས་འདོར་ཐུབ་པ་དེ་ལྟར་དུ་མི་གཞན་གྱིས་ཀྱང་ལས་སླ་བོའི་སྒོ་ནས་འདོར་ཐུབ་པ་ནས་འདོར་དགོས་པར་བསམ་མི་རུང་། ཁོང་ཚོ་སྡུག་བསྔལ་དེ་དག་འདོར་འདོད་ཀྱི་བསམ་བློ་མེད་ལ། གལ་ཏེ་དེ་ལྟར་སྡུག་བསྔལ་འདོར་མཁན་ཞིག་ཡིན་ན་ནི། དེ་ནི་ཁྲེལ་གཞུང་མེད་མཁན་དུ་བརྩི་བཞིན་ཡོད་ལ། མི་དེའི་རིགས་ནི་ཁྲེལ་གཞུང་མེད་པར་ཡང་འདོད་ཀྱི་ཡོད། ཁྱེད་རང་གི་མི་དེ་དག་གི་རྒྱུས་ལོན་མ་ཐུབ་ཡར་སྔོན་དུ་མི་དེ་དག་ནི་ནུས་མེད་རྐྱང་རྐྱང་ཡང་རེད་བསམ་མི་སྲིད་པ་མིན། དེ་འདྲ་ཡང་མིན། ཁོང་ཚོ་སྐྱེ་མ་ཐག་ནས་ཕ་མེས་ཡང་མེས་ཚོས་བསླབ་པ་ཡིན་སྟབས་ལས་སླ་བོ་ཞིག་འགྱུར་ཆོག་ཆོག་མེད་ལ། འགྱུར་བ་བཏང་བ་ཡིན་ན་ཁོ་རང་སྐྱེ་སའི་མི་རིགས་དེའི་འཕྱ་དམོད་དང་བརྙས་བཅོས་འཁུར་དགོས། དེ་དག་ནི་ནམ་ཡང་ཁོང་ཚོས་མི་འདོད་པ་ཡིན། དེའི་རྒྱུ་མཚན་གྱིས་ཁོང་ཚོ་དེ་ལྟར་འགྲོ་བཞིན་ཡོད། འདོད་པ་ཡོད་མེད་ལ་མ་བལྟས་པར་འགྲོ་དགོས་པ་ཆགས་ཀྱི་ཡོད། དེ་ལ་ཁྱེད་རང་གི་བསམ་ཤེས་བྱས་དེ་ཁྱེད་ཀྱི་རང་ཉིད་མི་དེ་དག་གི་བྱེད་སྟངས་ལ་གོམ་ལོབ་དུ་གཏོང་དགོས་ཀྱི་ཡོད་པ་རེད། ཡིན་ཡང་། ཁྱེད་རང་དེ་ལ་འདྲིས་ན་ཆོག་པ་ལས། ཁྱེད་རང་གི་སེམས་ཀྱི་གཏིང་སར་འཛུལ་ཆོག་གི་མེད། དེ་འདྲར་འགྱུར་ཆོག་ཆོག་དང་བརྗེ་ཆོག་ཆོག་ཞིག་མིན་པ་ནི་ཁྱེད་རང་གིས་ཀྱང་ལོས་ཤེས། ཡིན་ཡང་། ཁྱེད་རང་འགྱུར་དགོས་སའི་དུས་ཚོད་དང་དགོས་འཁོ་བྱུང་་དུས་ཁྱེད་རང་འགྱུར་དགོས་ལ། ཁྱེད་རང་གི་ཁོང་ཚོས་གང་བཤད་ལ་བརྩི་འཇོག་དང་བདེན་པ་རེད་ཟེར་ནས་རྒྱབ་སྐྱོར་བྱེད་དགོས། དེ་ལྟར་བྱེད་ཐུབ་དུས་ཀྱི་ཁྱེད་རང་ལ་ཁོང་ཚོས་སྤྱི་ཚོགས་ནང་ནས་བྱ་བྱེད་ལས་གསུམ་གང་ཡིན་ཐད་ཐོབ་ཐང་རེག་ངེས་ཡིན། ཐོབ་ཐང་དང་ཁྱེད་རང་ལ་རང་དབང་ལོངས་སུ་སྤྱོད་པའི་སྐལ་བ་དང་ནུས་པ་ལྡན་ཉིན། ད་གཟོད་ཁྱེད་རང་གི་རང་གི་གོམ་གཤིས་དང་ལྟ་བ་རྒྱུན་སྐྱོང་དང་སླར་གསོ་བྱེད་ཐུབ་མིན་ཁྱེད་རང་ལ་རེག་ལས་པ་ཡིན། དེ་ལྟར་དུ་སེམས་ལ་བཟུང་དེ་བཟོད་བསྲན་དང་ཏིང་སྙོམས་ལ་བརྟེན་ནས་རང་གི་དམིགས་མདུན་སར་སླེབས་ཐུབ་པ་བྱེད་དགོས་པ་དེ་ཤེས་པར་གྱིས་ཤིག ས་མཐའི་བུ། ཡུལ་གྱར་བུ། བཙན་བྱོལ་བུ། བོད་ཀྱི་བུ། རྒྱལ་ཁབ་མེད་པའི་བུ། གངས་ཅན་པའི་བུ། ལས་ལ་བརྩོན་ཞིང་དཔའ་ངར་ལྡན་པའི་མི། བརྩོན་པ་བྱོས་དང་། མི་ལ་བརྩོན་འགྲུས་ལྡན་གྱུར་ན། འཇིག་རྟེན་འདི་ན་དཀའ་བ་མེད།
འདི་ཚང་མ་དུས་བབ་ཟིན་བྲིས་ལས་བཤུས།